بعد ساعات من التشويق والانتظار، أعلن النجم المصري محمد هنيدي عن “مشروع القرن”، وهو تحويل “الكلسون” إلى علامة تجارية “براند”.
وشوق”هنيدي” جمهوره لمشروعه الجديد، وكتب عبر حسابه الرسمي على “فيسبوك” مازحا: “خلاص استقريت على مشروع، اللي هيكون أهم مشروع في القرن ٢١، وهعلن عنه اليوم الساعة ٩ و١١ دقيقة مساء بتوقيت شارع الجمهورية في المنصورة”.
وفي الوقت المحدد، عاد محمد هنيدي ليكتب إلى متابعيه: “مشروع القرن لكل الرجالة والشباب اللي كانت بتتمنع أو بتتكسف تنزل الشواطئ بكلسوناتها، قدرت أحل المشكلة وأحول لكم الكلسون لبراند”.
بألوان الطيف “ناقصة لون”
وأضاف “هنيدي” مازحا: “هتقدر تنزل به ١٧٧ شاطئ في مصر من أفخم الشواطئ، محدش هيقدر يمنعك ولا يتريق عليك لأنك لابس براند ثمنه 6 آلاف جنيه، يشمل الدخول لكل الأماكن الغالية والشواطئ والفنادق اللي فوق ٥٠ ألف جنيه في الليلة، وممكن تدخل به من بوابات مارينا بدون ما حد يكلمك، متوفر بكل الألوان، وألوان الطيف ناقصة لون”.
وسرعان ما أوضح “هنيدي” حقيقة منشوره، وكتب في تعليق: “طبعا الكلام هزار، ألبسوا اللي تحبوه في أي مكان عايزينه. مش لازم تلبس حاجة غالية عشان تعجب الناس ويقولوا ده ابن ناس. زي ما قال أبويا (ياما ناس لابسة بس قليلة الرباية)، واللي يحكم عليك بلبسك بيبقى عقله أصغر من عقل بسيط في كارتون سبونج بوب مع الاعتذار لبسين”.
وقبل يوم، طلب محمد هنيدي من جمهوره “مساعدة”، قائلا: “عايزكم تقترحولي مشروع كده أعمله من المشاريع اللي بتيجي فكرتها للواحد وهو قاعد على القهوة وبيضرب شاي نعناع ومعاه ازازة المياه المشبرة من فلتر حنفية القهوة، عشان المياه المعدنية غالية”.
وبعد إعلان مشروع “أبو كلسون”، أوضح “هنيدي”: “الفكرة دي خلاصة 12 كوباية شاي نعناع في قهوة المحروسة في طنطا، ويا ريت صاحبها يقدم المياه المعدنية كـ إزازة اختيارية بينها وبين مياه الحنفية، مش عشان القهوة واخدة ناصيتين تجبر الناس تشتري معدني”.