“يا أبو كرش”.. عمر كمال يرد على هجوم حمو بيكا: أنا ضمنتك في مليون و٨٠٠ ألف جنيه
خرج مطرب المهرجانات عمر كمال، ليرد على هجوم حمو بيكا، عليه، من خلال فيديو نشره عبر صفحته الشخصية بموقع التواصل الاجتماعي “فيسبوك”.
وقال عمر:”أنا تحملت كتير جدا إهانات بعض الناس، لكن أنا ممكن أطلع أقولك يا (أبوكرش) لكن كل ده كلام قلة أدب وقلة ذوق مليش فيه ومش بحب أقولها.. أنا أول أغنية اكسب منها علي قناتى كانت أغنية انتي معلمة، وكل الأغانى اللى قبل كده كنت بديها لحمو بيكا ولباقي الناس، عشان يرفعها على قناته ويكسب منها بما فيهم أغاني كانت من إنتاجى أنا، والله مكنتش باخد فلوسهم لأنى بكسب من زمان وسيبتك تاكل عيش”.
وأضاف:”الشخص اللي بيتكلم عليا ده أول ما بينزل القاهرة بيجي على شقتى وواكلين عيش وملح مع بعض، اللي حصل إن وأنا قاعد عند الحلاق بتاعي ومعايا حمو فوجئت إنه جايب واحد صاحب سنتر بتاع فساتين وعايزنا نعمله إعلان من غير ما ياخد إذنى، وأنا اتحرجت أرفض قدام الراجل، بس أنا مش عايز اعمل مهرجان لبوتيك فساتين أفراح، أنا عايز اعمل فن كويس زى بنت الجيران وعود البطل وكل مهرجاناتى، وحتى بعد الاتفاق ولا سألنى تاخد كام، على عكس ما بعمل معاه في أى فرح حد بيطلبه فيه”.
وتابع:”عيب تقول عليا إني صحبة مزيفة محدش وقف معاك قدي، ممكن تكون فلوسك دلوقتي مش مناسبني أنا عمري ما كسبت من وراك، طول عمري بسيب للناس شغلى وتراكاتي تكسب من ورايا..انا اللي بتكلملك مع نقابة الموسيقين ومع استاذ هاني شاكر في مشكلتك الأخيرة، وتراك انتي معلمة سبب تاخيره وجودك معايا فيه وانا اللي رحت واتكلمت وقولتهم ده قلبه ابيض ومفيش كلام فيه اسفاف.. وعيب يا بيكا تكتب بوست كدة احنا كلنا عيش وملح مع بعض في بيتي اتصل بيا قولي عيب تقول عمر كمال صحبة مزيفة”.
واختتم حديثه:أنا سيبتلك 12 تراك كلت من وراهم الشهد، حتى العربية بتاعتك أنا اتصدرت أنا ومدير أعمالى عند المعرض عشان يقسطهالك، وضمنتك فى مليون و800 ألف جنيه، ولو كنت لوحدك مكنش حد هيديك عربية”.
وكان مطرب المهرجانات حمو بيكا، قد شن هجومًا على المطرب عمر كمال، مؤكدًا أنه من الأصحاب المزيفين.
ونشر بيكا صورة لعمر كمال تحمل علامة “x”، وعلق عليها عبر صفحته الشخصية بموقع التواصل الاجتماعي “فيسبوك”:”ياريت محدش يكلمنى في شغل على الشخصية دى، عشان أنا كنت بحبها، والشخصية دى بتتهرب من شغلى اللى خلانى اتفق عليه، والإثبات بعد الصورة دى هنزل فيديو”.
وتابع:”هو عامل بيحبنى وهو بيكرهنى، مع السلامة يا صحاب مزيفة”.
